Vídeó

skagaleikflokkurinn — Mon, 25 Oct 2010 15:56:56 +0000

Næstu sýningar
4. sýning föstudaginn 29. október kl. 20:00
5. sýning föstudaginn 12. nóvember kl. 20:00
6. sýning sunnudaginn 14. nóvember kl. 20:00
7. sýning fimmtudaginn 18. nóvember kl. 20:00
8. sýning mánudaginn 22. nóvember kl. 20:00

Frá formanni Skagaleikflokksins

skagaleikflokkurinn — Mon, 25 Oct 2010 15:08:25 +0000

Til hamingju! Skagaleikflokkurinn er upprisinn. Eftir nokkurra ára hlé hefur leikflokkurinn nú hafið starfsemi að nýju og hlýtur að vera öllum gleðiefni að svo ágæt menningarstarfsemi skuli vöknuð til lífsins. Ný stjórn hefur verið mynduð með nýju fólki, blanda ungra og eldri, sem hefur metnað og löngun til öflugrar starfsemi.

Stærstur hluti af starfsörðugleikum leikflokksins er að hann hefur enga fasta aðstöðu til starfsemi sinnar. Þetta er vandamál sem nauðsynlegt er að leysa svo leikhússtarf og leiklistaruppeldi geti þrifist á Akranesi. Stefnan leikflokksins er að hann verði ekki aðeins einnar sýningar leikhús á ári hverju heldur eitthvað meira. Því er hugmyndin að koma af stað nokkurskonar leiksmiðju seinni partinn í nóvember og sýna afurðir hennar í janúar til febrúar. Er æskilegt að ungir sem aldnir komi til þeirra verka með okkur og taki þátt í smíði og samningu leikverks sem alfarið yrði þeirra sjálfra. Einnig hefur leikflokkurinn áhuga á að taka upp aukið samstarf við nemendur Fjölbrautarskólans og ef til vill fleiri til að nýta sem best húsnæði og leikkrafta á sem fjölbreyttastan hátt.

Reynslan hefur sýnt að minni bæjarfélög en Akranes hafa burði til að halda úti öflugri leikhússtarfsemi sem vakið hefur athygli víða um land. Má þar til nefna Leikfélag Húsavíkur sem dæmi. Vonandi ber okkur Akurnesingum gæfa til að taka myndarlega á í þessum efnum. Því hvað er betra til að lyfta sér upp úr bosi hversdagsins en fara í leikhús sér til skemmtunar og uppbyggingar. Já eða taka þátt í starfinu.

Með kærri kveðju,
Sigtryggur Karlsson

Frumsýning í kvöld

skagaleikflokkurinn — Fri, 22 Oct 2010 14:42:28 +0000

Ólíkindagamanleikurinn Fiskar á þurru landi verður frumsýndur í kvöld í 120 manna leikhúsi Skagaleikflokksins að Vesturgötu 119.

Miða á næstu sýningar má panta í síma 847 7742 (Elín Ólöf) milli kl. 17 og 19 á sýningardögum eða kaupa fyrir sýningar frá kl. 19:15 – sýningar hefjast kl. 20. Miðaverð er kr. 1.500.

Sjá má myndir frá sýningunni HÉR.

Næstu sýningar
2. sýning sunnudaginn 24. október kl. 20:00
3. sýning þriðjudaginn 26. október kl. 20:00
4. sýning föstudaginn 29. október kl. 20:00
5. sýning föstudaginn 12. nóvember kl. 20:00
6. sýning sunnudaginn 14. nóvember kl. 20:00

Leikskráin senn í dreifingu

skagaleikflokkurinn — Wed, 20 Oct 2010 16:17:43 +0000

Leikskrá Fiska á þurru landi er nú í prentun og á morgun, fimmtudag, fer hún í dreifingu inn á hvert heimili á Skaga. Með því að smella HÉR má lesa leikskrána á vefnum.

Miðasala komin í fullan gang

skagaleikflokkurinn — Tue, 19 Oct 2010 21:00:43 +0000

Nú líður að frumsýningu ólíkindagaman-leiksins Fiskar á þurru landi sem Skagaleikflokkurinn æfir nú að kappi. Á mánudagskvöld var æft með fullu sminki og búningar og leikmunir á sínum stað. Æft er hverju kvöldi þessa vikuna fyrir frumsýninguna á föstudagskvöldið kemur, 22. október.

Opið er fyrir miðasölu og hægt að panta hjá fröken miðasölustýru Elínu Ólöfu í talsíma 847 7742 milli kl. 17 og 19 á sýningardögum. Miðasala við innganginn fyrir sýningar er frá kl. 19:15. Miðaverð kr. 1.500.

Skagaleikflokkurinn aftur af stað

skagaleikflokkurinn — Fri, 08 Oct 2010 14:43:34 +0000

Skagaleikflokkurinn er kominn af stað aftur eftir hlé. Undanfarið hafa staðið yfir æfingar á gamanleiknum Fiskar á þurru landi, eftir Árna Ibsen. Leikstjóri er Þröstur Guðbjartsson og áætlað að frumsýna föstudagskvöldið 22. október næstkomandi. Þrjú ár eru síðan Skagaleikflokkurinn sýndi síðast, það var Sölku Völku eftir Nóbelsskáldið og fékk sú sýning mjög góða aðsókn. Æfingar eru í gamla Artichúsinu að Vesturgötu 119 og er þessa dagana verið að breyta því í leikhús sem mun taka um 120 manns í sæti.

Ný stjórn var mynduð í Skagaleikflokknum síðasta haust og er Sigtryggur Karlsson formaður. Hann segir að sjálfboðaliðar séu mjög vel þegnir á Vesturgötuna núna þessar vikurnar þegar unnið er að leiktjaldasmíði og ýmsu öðru í tengslum við sýninguna. Sigtryggur segir Fiska á þurru landi mjög skemmtilegt stykki. Leikendur eru aðeins fjórir í sýningunni og eru hlutverkin í höndum þeirra Gunnars Sturlu Hervarssonar, Hafdísar Bergs, Guðmundur Claxton og Þórdísar Ingibjartsdóttur.